నాన్నగారు మాకు బాగా సుపరిచితం. ఆయన ప్రవచనాలకి వెళుతూ ఉండేవారం. ఒకరోజు నాన్న గారితో మేము ఇల్లు కట్టుకుంటున్నాము అని చెబితే, చాలా సంతోషపడ్డారు. మా మనవరాలు బ్యాగ్లు కుడుతూ ఉంటుంది. ఒకరోజు తను కుట్టిన బ్యాగ్ నాన్నగారికి ఇద్దామని, మా మనవరాలిని కూడా తీసుకుని నాన్నగారి దర్శనానికి వెళ్ళాను. నాన్నగారు ఆ బ్యాగ్ చూసి ఏంటమ్మా? బట్టలు పట్టుకుని వచ్చారా? అని అడిగారు. బట్టలు కాదు నాన్న గారూ! బ్యాగు పట్టుకుని వచ్చాను. ఏమీ లేకుండా ఉన్న వాళ్ళం ఈరోజు మీ దయవల్ల ఇల్లు కట్టుకుంటున్నాము అని చెప్పి, దయచేసి ఈ బ్యాగ్ మీరు తీసుకోవాలి అన్నాను. అలాగమ్మా! నేను బద్రపరుచుకుంటాను అని చెప్పి బ్యాగ్ లోపలికి పట్టుకొని వెళ్ళి, తిరిగి వచ్చి మా మనవరాలిని ఆశీర్వదించారు.
వేంకట నరసమ్మ గారు:
నాన్నగారి దగ్గరకు శివరాత్రి పర్వదినాన, నామం తీసుకుందామని వెళ్ళి గుమ్మం దగ్గర నిలబడి ఉన్నాను. నాన్నగారు నన్ను పిలిచి ఏమిటమ్మా? అని అడిగారు. నామం తీసుకోవాలి అని వచ్చాను నాన్నగారూ అన్నాను. ఏ నామం చేసుకుంటావమ్మా? అని అడిగారు. శివ నామంచేస్తాను అంటే, శివ నామమే ఇచ్చారు. నాకు చాలా అనుభవాలు స్వప్నంలో కలుగుతూ ఉండేవి.
నాకు సరిగ్గా నిద్ర పట్టేది కాదు. నాన్నగారి దగ్గరకు వెళ్ళి నాన్నగారూ నాకు రాత్రుళ్ళు సరిగ్గా నిద్ర పట్టటం లేదు అని చెప్పాను. అలా నాన్నగారు నా వైపే చూస్తూ మీకు వారం రోజులలో నిద్ర పట్టేస్తుంది అన్నారు. ఆయన సమక్షంలో చాలా శాంతిగా ఉండేది. ఆ వారం రోజులు కూడా క్రమం తప్పకుండా జిన్నూరు వెళ్ళాను. నిద్రలేమి సమస్య గురించి నేను ఏమీ మందులు వాడలేదు. కానీ, నాన్నగారు చెప్పినట్టు నాకు ఆ వారం రోజుల తరువాత నిద్ర పట్టేసింది. ఆ తరువాత నుండి నాన్నగారి దగ్గరకి రోజు వెళ్ళేదాన్ని.
మా పిల్లలకి అన్నప్రాసన, అక్షరాబ్యాసం అన్నీ ఆయన చేతుల మీదుగానే చేశారు. ఎప్పుడూ నాన్నగారి పాదాలే చూస్తూ ఉండేదాన్ని. నాన్నగారికి చివరి రోజులలో ఆరోగ్యం బాగాలేదు అని ఆయనను చూడటానికి వెళ్ళాను. అక్కడ ఉన్న సూర్యవతి అక్క నన్ను లోపలకి పిలిచారు. అలా నాన్నగారి దగ్గరకు వెళ్ళాను. నాన్నగారు ఆ రోజు అసలు కదల లేదు. ఆయనను చూసి చాలా బాధపడ్డాను. నాన్నగారు దుప్పటి కప్పుకోవటం వలన నాన్నగారి పాదాలు కనబడటం లేదు. నాన్నగారి పాదాలు కనబడటంలేదు అనుకుంటున్నాను. ఈ లోపు ఆ దుప్పటిని ప్రక్కకు జరిపి నాకు పాదాలు కనిపించేటట్టు చేసి నన్ను ఆనందింప చేశారు.
No comments:
Post a Comment